Վահան Հայրապետյանը և Միհրան Քոչարյանը հայց են ներկայացրել ընդդեմ «Յուքոմ» ՓԲ ընկերության՝ 16.12.2022թ. թվով երկու աշխատանքից ազատելու կարգապահական տույժ կիրառելու մասին հրամաններն անվավեր ճանաչելու, նախկին պաշտոնում վերականգնելու, չվճարված միջին աշխատավարձը և 19.12.2022 թվականից ի վեր հարկադիր պարապուրդի ամբողջ ժամանակահատվածի համար հաշվեգրման ենթակա միջին աշխատավարձը բռնագանձելու պահանջների մասին:
Նախնական դատական նիստը նշանակված էր 2023 թվականի մարտի 24-ին:
Դատական նիստը բացվելուց հետո դատական նիստերի քարտուղարը զեկուցեց, թե ովքեր են ներկա դատական նիստին: Այնուհետև կողմերը ներկայացան, դատարանը ճշտեց նրանց ինքնությունը:
Դատարանը կողմերից ճշտեց ինքնաբացարկի կամ բացարկի միջնորդություն ներկայացնելու ցանկության մասին. կողմերը չունեին նման միջնորդություններ:
Նախքան դատական նիստը, պատասխանող կողմը դատարանին գրավոր միջնորդություն էր ներկայացրել՝ հայցն առանց քննության թողնելու մասին, սակայն, միջնորդությունը պատշաճ կերպով չէր ուղարկել հայցվորին: Այս հիմքով դատարանը որոշեց առանց քննության թողնել միջնորդությունը:
Պատասխանող կողմը միջնորդեց դատարանին հետաձգել գործի քննությունը, որպեսզի հայցվոր կողմին ուղարկեն միջնորդությունը, և վերջինս միջնորդությանը ծանոթանալու համար ժամանակ ունենա: Հայցվոր կողմն առարկեց՝ նշելով, որ պատասխանող կողմը կարող էր նախապես իրենց ուղարկել միջնորդության օրինակը և, դա չանելով, նպատակ է հետապնդել անհարկի կերպով ձգձգել գործի քննությունը:
Դատարանի առաջարկով պատասխանող կողմը միջնորդության մի օրինակը տեղում տրամադրեց հայցվորին, վերջինս ծանոթացավ (ծավալը մեծ չէր՝ մոտ մեկ էջ) և հայտնեց իր առարկությունը դրա բովանդակության վերաբերյալ:
Դատարանն այս անգամ արդեն քննության առավ միջնորդությունը և գտավ, որ այն ենթակա է մերժման:
Այնուհետև հայցվորը ներկայացրեց հայցի առարկան, հետո՝ փաստական հանգամանքները: Պատասխանող կողմն էլ ներկայացրեց իր դիրքորոշումը, ինչը մնացել էր անփոփոխ. այն է՝ հայցի մերժում:
Հայցի առարկայի վերաբերյալ կողմերի դիրքորոշումները լսելուց հետո դատարանը հարցրեց նրանց, թե արդյոք պատրաստ են հաշտության համաձայնություն կնքել: Կողմերը համաձայնեցին հաշտությամբ վեճի լուծմանը:
Դատարանը նշեց, որ կողմերին ժամանակ է պետք՝ հաշտության հնարավոր պայմանները քննարկելու և համաձայնեցնելու համար: Այդ հիմքով դատարանը որոշում կայացրեց դատական նիստը հետաձգվել և հաջորդ դատական նիստը նշանակեց 2023 թվականի ապրիլի 14-ին, ժամը՝ 16:00-ին:
